当前位置: 主页 > N生活店 >HIDDEN AGENDA:谈Live House、独立音乐 >

HIDDEN AGENDA:谈Live House、独立音乐

2020-08-15 02:31:45 来源:N生活店 浏览:987次
HIDDEN AGENDA:谈Live House、独立音乐

喺讲Hidden Agenda被打压一事同有关制度之前,我想主要讲吓live house嘅本质同埋其重要性。因为比较熟悉台湾独立音乐,希望以台湾情况与香港做比较,亦都可以作为参考。

同大公司捧新人嘅模式唔同,好多独立音乐人都係从live house呢啲细场地慢慢储乐迷,然后走上更大舞台,进佔主流华语市场,直接影响整个音乐文化。以台湾为例,live house孕育咗咩歌手呢?五月天、苏打绿、张悬、陈绮贞、卢广仲。冇live house,几乎就唔会佢地。

去返香港,我地有My Little Airport、触执毛呢两队喺海外有相当名气嘅band、近年风头一时无两嘅乐队Supper Moment、今年香港第一首破二百万Youtube views嘅歌《长相厮守》,主唱嘅ToNick,佢地亦都曾经喺Hidden Agenda表演。

香港音乐已死?My Little Airport嘅专辑係连西班牙公司都搵佢地出版,连外国band都会翻唱佢地嘅歌;触执毛仲曾经获得《Times》点名讚赏;Supper Moment、ToNick就更加唔使讲啦。

你够胆话live house唔重要咩?如果冇咗以上呢堆,以及更多喺live house成长嘅音乐人,今日嘅华语音乐,会係一个点嘅模样?

Live house不但容许初出茅庐嘅音乐人做表演、累积经验同名气,亦提供一个自由嘅空间畀不同类型嘅音乐人——无论你係metal或是hip hop,folk song还是punk rock,你都可以喺live house随心随性地表演。同时,live house嘅存在亦都吸引更多外国嘅乐队前来表演。而呢种独特嘅音乐文化,亦或多或少促成大型音乐节。香港就净係得一连三日嘅Clockenflap,但台湾一年讲紧可能有五六个音乐节,唔同乐队之间可以有交流、合作、jam歌嘅机会,令到整个音乐文化变得更加多元、丰富。

而相比起一般主流歌手喺红馆、博览馆、伊馆、九展呢啲可以容纳成千上万人、讲求华丽同视觉享受嘅表演,因为场地细小、观众有限,live show更加看重表演者同观众之间嘅互动。

因为呢个缘故,唔少喺live house表演嘅独立音乐人会提到唔同嘅社会议题、宣扬佢地对于社会嘅想法同信念。同志平权、环保反核、民主自由,无一不是独立音乐人会涉猎嘅议题。好多台湾独立音乐人非常积极地推动公民社会运动,例如闪灵主唱Freddy而家已经成功当选成为台湾立法院委员,当年太阳花学运亦都係佔领立法院嘅一份子;张悬出席立法院公听会演讲推动同志婚姻合法化;巴奈早两日先因为公民抗命佔路而被警察带走……喺香港, My Little Airport嘅歌下下直线抽击政府,电影《一念无明》两首电影配乐嘅唱作人黄衍仁本身活跃于社运圈。而2012年反国教运动当中,于九月一日进行嘅公民开学礼,基本上就係独立音乐会;2013年HKTV发牌风波,ToNick主唱恆仔亦都有到场献唱声援。

简单啲讲,live house同独立音乐係可以改变到一个地方嘅文化,提升社会嘅软实力,甚至可以推动公民社会。之不过创意工业也好,独立音乐也罢,都係极度需要政府配合先能够成事。

台湾曾经有个live house,叫地下社会,就係五月天初出道常驻嘅表演场地。佢地都係因为牌照制度问题多次被封场,最终被逼结业。当时唔少人都希望政府能够建立live house嘅牌照制度,为live house正名。五月天甚至为此事于金曲奖表演时连同其他乐团当住时任文化部长龙应台嘅面前抗议(https://www.youtube.com/watch?v=IE4Yt9qE2mc ),玛莎同怪兽都有参与示威,可惜最后仍是无功而还。

虽然如此,台湾其实係有好多live house场地同配套,令到佢地嘅独立音乐百花齐放。佢地嘅live house包括将旧工厂地改建成文化园区嘅华山文创、松菸文化园区入面嘅Legacy;于旅游景点西门红楼内的河岸留言;于商埸内嘅ATT SHOW BOX;一半cafe一半live house、Indie乐迷朝圣地女巫店;每年台湾各地一共有五六个音乐节,其中贡寮海洋音乐祭更加係因为政府有份主办所以係免费;几乎每个城市(台北、台中、高雄、宜兰、台东)都至少有一个live show表演场地同文化园区。

拎个多啲人知嘅例子来讲:五月天今年成军二十周年,佢地同台北市政府合作,喺大安森林公园免费搞一场演唱会,搞晒Youtube直播,仲係特意安排座位畀社福团体,令较少机会同资源嘅青少年都可以参与。香港政府呢?就净係识得喺七一、十一搞维稳show,收钱之余都仲係请外地歌手来表演。

当今日Hidden Agenda——呢个搞得有声有色,每年过百场表演嘅独立音乐场地,因为租金等等原因只能够喺工厦生存,而政府口口声声讲要「活化工厦」、「鼓励创意产业」,但係就从来都冇完善嘅制度去容纳呢种live house,仲要选择性执法,出动警方、入境处、消防处、食环署一次又一次针对性咁打压。到最后甚至动用警犬同防暴警察,郁手锁喉咁去对付表演场地负责人,抹杀呢个表演场地嘅所有空间,係咪代表政府从来都冇诚意去解决问题,推动本土文化呢?定係呢个就係佢地打压HIDDEN AGENDA嘅hidden agenda呢?

最后我谂琴日喺Hidden Agenda表演嘅乐队队名其实有一个好清晰嘅message:TTNG。So what does TTNG stand for?

“THIS TOWN NEEDS GUNS.”

延伸阅读:

1. 「女巫.live house.独立音乐」系列一《那些年我们恋过的女巫店》

2. 《不止关于地下社会,还有许多未来》五月天玛莎

上一篇:
下一篇:
相关资讯